Heb 9 | BDD | STEP | Loina nugenugetana 'alona loina baibaiwana simiyamiya tapwalolo weyahina, ma wete hada tapwalolo bale'uwa weyahina.

Hebrews 9

Hada He'asisi weyahina

1 Loina nugenugetana 'alona loina baibaiwana simiyamiya tapwalolo weyahina, ma wete hada tapwalolo bale'uwa weyahina. 2 Ta hadaina hebai 'wapidiyega sipaihoweya, ta 'ale'o 'oinega sibiliupa* luweya ta biliupa madouna sihesaniyeya Tupwa He'asisi*, ma biliupa 'i'iuna beno 'alona moisa sihesaniyeya Tupwa He'asisi Hedade*. Biliupaina madouna 'alona mayale 'adi 'ebelagu ma 'aigeda teibele, ma teibeleina 'oina beledi silagulagu Yehoba matana.

3 Ma Tupwa He'asisi Hedade 'alona 'ebegabu 'imiyamiya gado'a* weyahina, beno goula* 'oinega sipaihoweya, ta wete loina 'ana dedewaga 'imiyamiya, beno goula wete 'oinega sipaihoweya, ta dedewagaina 'alona gaeba goula 'imiyamiya, ta gaebaina 'alona tubudao 'adi 'e'ahai sanina mana*, tupwana 'imiyamiya. Ta wete dedewagaina 'alona Eloni 'ina digona, beno mwalo 'ibwala, ta wete da'uleyedi Yehoba 'ina loinao 'oidiya 'ilelediya simiyamiya. 5 Ma dedewagaina pwatana 'eluwa anelose namanamalidi sipaihowediya ta dedewagaina siheloguloguya, beno Yehoba 'ina 'ebemiya tomota 'idi puiyao 'adi nuwasam weyahidi. Ta hesi sahena tanuwanuwatuhu hedade tobwatobwaedi weyahidi.

6 Ceguma tobwatobwa mabwaiyadi si'atububudi, 'oinega topwaoliyao siluhuluhu Hada He'asisi 'alona ta 'idi paihowa sipaipaihowa; 7 ma hesi Tupwa He'asisi Hedadeina Topwaoli Madounamo 'oina 'iluhu, ma bolime 'aigeda 'oina ma'aigedamo. Ta tutaina 'iluhuluhu bweyaha 'i'ewa ta bweyahina 'ilosehusehule, gide 'ipwaopwaoli Yehoba 'oina 'ina mumuga galadi weyahidi, ta wete tomota mabwaiyadi 'idi puiyao weyahidi.

8 Bewa 'ebe'ita tomota hauhauda 'oida, Yaluyaluwa Tabuna 'oinega, ta 'oinega tasanapu 'abehega 'eguma paihowaina miyamiyaina 'abwa tapaipaihowa, geya sawasawahina ma taluhu Tupwa He'asisi Hedade 'alona. Eeta helauwao ma hebahebai loina miyamiyaina 'oinega sipwaopwaoliyedi Yehoba 'oina, ta hesi geya sawasawahidi ma tomotaedi 'atedi si'abihe'ehau, ta wahidimo si'abihe'ehau, 10 'eguma loinaowedi tomota simulimuliyedi 'e'ahai ma 'adi we'aha ma hali buyo ma hali buyo weyahidi. Weyahina mwalo loinaina miyamiyaina Yehoba 'ilaguya ta 'imiyamiya 'ana siga Keliso 'ilatuma ta loina 'ibuiya. 11 Weyahina 'iboi 'ina pwaoliyega miya bwebwe'ana hedade 'i'ebwaegita, ta hali Hada He'asisi 'oina 'iluhuwa, ta hadaina madouna ta bwebwe'ana, beno tomota geya si'abi bale'u 'oina. 12 Coinega Yesu Tupwa He'asisi Hedade 'oina 'iluhuwa ma'aigeda, ta bweyaha 'oinega 'ipwaoli, ma bweyahina geya hebai goti* bweyahidi bo bulumakau 'i'iudi bweyahidi, ta hesi tauna bweyahina, ta 'oinega 'ada 'abihe'ehau hataya talobeya.

13 Ceguma ginaula bi'ibi'ina ta'abitoho ma wahida ta'abihebi'i ma goti bweyahina nuwana bulumakau bweyahina 'oidiyega talosehuligita, nuwana bulumakau mewahinena tagabu ma 'oinega tapwaoli Yehoba 'oina, beno 'ebe 'abihe'ehau wahida weyahina. 14 Ta hesi Keliso bweyahina 'ebe 'abihe'ehau bwebwe'ana hedade, weyahina 'ateda 'i'abihe'ehaudi ma 'oinega paihowa besobeso talogwahatedi, ta Yehobaina mayawasina 'ina paihowao tapaihowadi. Weyahina Yaluyaluwa Tabuna miyamiya hatayana Keliso 'i'abihe waiwaiya, ta tauna ma'ina mumuga mabwaiyana dumwaluna ta geya 'aigeda wete galana 'oina, 'oinega tauna 'ipwaoliyeya Yehoba 'oina, beno 'i'amasa tauda 'ada 'ehau weyahina. 15 Eeta Kelisoina loina hauhauna 'i'eweyama ta 'oinega tanaoma Yehoba ba'idadai tahe'iya'iyagu, weyahina 'eguma 'ihesinuwegita nata yawasida hataya 'igwae hemisaeya 'i'ebwaegita. Weyahina tauda loina nugenugetana taligehiya, 'oinega 'ilobwaineya ma ta'amasa, ta hesi Keliso weyahida 'i'amasa pwaiya sabi 'abihetegita.

16 Wasanapuya 'eguma taiya to'waiha loina mwalo 'ilaguya nuwana 'ileleya, 'ina tobwatobwa mabwaiyana 'adi heguyai weyahidi, ma muliyetega 'i'amasa, ta loinaina 'ina susuwao sida muliye. 17 Ta 'eguma 'abwa mayawasina, geya'abwa loinaina simulimuliye. Beno namo 'eguma 'i'amasa, loinaina 'ihewaiwai ma simuliye.

18 Gide wete loina nugenugetana Mosese 'oinega, nugeta tupwadi hebai silohe'amasidiya, ta bweyahidiyega buki ma tomota mabwaiyadi Mosese 'ilosehu sehulidiya, ta 'oinega muliyetega loinaina 'ihewaiwaiya.

19 Weyahina loina mabwaiyadi 'ihepwailediya tomota 'oidiya, ta 'oinega bulumakau 'i'iudi bweyahidi ma goti bweyahidi we'aha ba'idana 'ihebweliyeya, ta 'i'eweya, ta sipi hunuhunuwana belabelalana 'i'eweya, ma 'aiwe sanina hisopa* matana 'ibadiyeya, ta bweyaha ma we'aha 'alona 'ihebuteya, ta 'oinega buki ma tomota 'ilosehu sehulidiya, 20 ma Mosese 'igwaeya,

“Loinaina Yehoba 'ilaguya weyahimi, 'ana 'ila'ilala bweyaha bewa.”
21 Gide wete Hada Tapwalolo ma gaebaedi Hada Tapwaloloina 'oina bweyahega 'ilosehu sehulidiya. 22 Weyahina Mosese 'ina loina 'oidiya 'abehega ginaula mabwaiyadi bweyahega si'ehau. Ta mumuga galana 'ana nuwasam wete bweyaha 'oinega, ma 'eguma geya bweyaha 'idau gesowana nuwasam taloba.

23 Hada He'asisi 'ana tobwatobwao galewa simiyamiya, ta 'adi ma'ama'ayau tuwa bale'uwa Mosese 'ipaihowediya, ta 'ilobwaineya ma bweyaha 'ana paihowega 'ipwaopwaoli Yehoba 'oina ma 'i'abihe'ehaudi, ma hesi ginauledi galewa 'adi 'abihe'ehau pwaoli bwebwe'ana hedade 'oinega, beno Keliso bweyahinega. 24 Ta Keliso geya 'iluhu Hada He'asisi 'abi'abina 'oina, beno Hada moisa 'ana ma'ama'ayau tuwa, ta hesi galewa 'iluhuwa ta Yehoba matana 'imiyamiya ma 'ilemalema weyahida.

25 Kelisoina sahena sauga baibaiwana tauna wahina 'i'e'eheleye nuwana 'ipwaopwaoli Yehoba 'oina, gide bolime 'aigeda 'aigeda Tupwa He'asisi Hedadena* 'alona Topwaoli Madouna 'iluhuluhu ma bweyahega 'ipwaopwaoli, ta bweyahina geya tauna bweyahina. 26 Moisa, 'eguma Keliso 'ina paihowa taudi topwaoli madoudi gide, 'ida 'amasa hilahila bale'u 'ana gihehemasalaha 'oinega ta tuta nige. Ta hesi ma'aigedamo tuwa, tuta 'ana 'ebelosaloha bewa 'oina, wahina tauna 'ipwaoliyeya, mumuga galadi 'adi nuwasam weyahina.

27 Tomota tauda 'ada loina 'imiyamiya 'abehega ma'aigeda ta'amasa ta muliyetega bwa'omatana. 28 Wete gide Keliso 'ina 'amasega tauna 'ipwaoliyeya ma'aigedamo tuwa, ma baibaiwada mumugada galadi 'i'ewa yahulediya, ma 'abwa 'ihilama, ma geya 'abehega mumuga galadi 'i'ewayahule hiladi, ta hesi sabi 'abihetegita, 'eguma ma'ida nuwa'ewa tayamwayamwa.